Neft qiymətləri əvvəlki sessiyanın sonunda demək olar ki, üç həftənin ən yüksək səviyyəsinə qalxdıqdan sonra çərşənbə günü səhər mülayim şəkildə enir.

Banco.az xəbər verir ki, Londonun ICE Futures birjasında Brent markalı neftin iyul fyuçerslərinin qiyməti 0,39 dollar (0,59%) ucuzlaşaraq 66,24 dollar/barelə bərabər olub. Çərşənbə axşamı bu müqavilələr 1,67 dollar (2,57%) artaraq 66,63 dollar/barelə çatıb.

Nyu-York əmtəə birjasında (NYMEX) elektron hərraclarda iyun ayı üçün WTI markalı neftin fyuçersləri 0,38 dollar (0,6%) ucuzlaşaraq 63,29 dollar/barelə bərabər olub. Əvvəlki sessiyanın yekunlarına əsasən, bu müqavilələrin dəyəri 1,72 dollar (2,78%) artaraq bir barel üçün 63,67 dollar olub.

Bu həftə neft bazarı üçün əsas müsbət amil ABŞ və Çinin idxal rüsumlarının 90 gün müddətinə qarşılıqlı azaldılması ilə bağlı razılığa gəlməsi xəbəri olub. Analitiklər ümid edirlər ki, bu müddət ərzində dünyanın iki ən böyük iqtisadiyyatı uzunmüddətli ticarət razılaşması əldə edə biləcək.

Bundan əlavə, ABŞ prezidenti Donald Tramp Tehranın nüvə silahı istehsal etməsinə icazə verməyəcəyini bildirib və əlavə edib ki, İran rəhbərliyi nüvə sazişi üzrə danışıqlarda yarı yolda görüşməsə, ABŞ maksimum təzyiq siyasətini davam etdirəcək və İran neftinin ixracını sıfıra endirməyə çalışacaq.