Müəllif:Mehin Qasımova,Banco.az

"Canva" şirkəti işçi qüvvəsinin 22 faizini əhatə edən genişmiqyaslı restrukturizasiya planını elan edib. Proses ümumilikdə 1271 əməkdaşa təsir göstərəcək.

Banco.az xəbər verir ki, şirkətin həmtəsisçisi və baş direktoru Melani Perkinsin açıqladığı plana əsasən, dəyişikliklər işçilərin bir hissəsinin vəzifələrinin və iş yerlərinin dəyişdirilməsini, bəzi əməkdaşların şirkətin baş ofisinin yerləşdiyi Sidneyə köçürülməsini, eləcə də müəyyən sayda işçinin ixtisarını nəzərdə tutur.

Perkins bildirib ki, şirkətin növbəti 10 il üçün hədəflərinə çatması məqsədilə mövcud təşkilati strukturun yenilənməsinə ehtiyac yaranıb. Yeni model daha kiçik komandaların yaradılmasını, qərarvermə prosesinin sadələşdirilməsini və əməkdaşlara daha geniş səlahiyyətlərin verilməsini nəzərdə tutur.

Restrukturizasiya çərçivəsində Məhsul, Böyümə və Platforma komandaları vahid məhsul təşkilatında birləşdiriləcək. Eyni zamanda, idarəetmə səviyyələri azaldılacaq, oxşar funksiyaları yerinə yetirən vəzifə və məsuliyyətlər birləşdiriləcək.

Şirkət ofis siyasətində də dəyişiklik edəcək. Yanvar ayından etibarən əksər hibrid iş rejimində çalışan əməkdaşlardan həftədə iki-üç gün ofisdə işləmək tələb olunacaq.

İşdən ayrılacaq əməkdaşlara isə ən azı altı aylıq əməkhaqqı, 12 aylıq tibbi sığorta və yeni iş tapmalarına kömək edəcək karyera dəstəyi təqdim ediləcək.

Qeyd edək ki, restrukturizasiya Canva-nın fəaliyyət modelini dəyişdirmək və gələcək inkişaf strategiyasına uyğunlaşdırmaq məqsədi daşıyır.