Müəllif: Gülnar Əhmədli, Banco.az
Avrodan istifadə etməyən ölkəyə səyahət etmək tətil büdcəsinin avtomatik olaraq daha aşağı olacağı demək deyil. Valyutanın Azərbaycan manatı qarşısındakı məzənnəsi ilə yanaşı, həmin ölkədə məhsul və xidmətlərin qiymətləri də mühüm əhəmiyyət daşıyır.
Yerləşmə, restoran, şəhərdaxili nəqliyyat və turistik məkanlara giriş haqları ümumi tətil xərclərini müəyyən edən əsas amillərdir. Buna görə də səyahətdən əvvəl yalnız valyuta məzənnəsinə deyil, gediləcək şəhərdə gündəlik xərclərin səviyyəsinə də diqqət yetirmək lazımdır.
Banco.az avrosuz səyahət edə biləcəyiniz bəzi ölkələri təqdim edir:
1. Varşava: Polşanın tarix qoxuyan paytaxtı
Polşanın paytaxtı Varşava tarixi memarlığı, muzeyləri və geniş yaşıllıq əraziləri ilə Avropanın diqqətçəkən şəhərləri sırasındadır. Visla çayının sahilində yerləşən şəhərdə avro əvəzinə Polşa zlotısı istifadə olunur.
İkinci Dünya müharibəsi zamanı böyük ölçüdə dağıdılan Varşavanın tarixi mərkəzi genişmiqyaslı bərpa işləri nəticəsində yenidən qurulub. UNESCO-nun Dünya İrsi Siyahısına daxil edilən İçərişəhər rəngarəng binaları və meydanları ilə turistlərin ən çox üz tutduğu məkanlardan biridir.
Şəhərdə tarixi məkanlarla yanaşı, təbiətin qoynunda vaxt keçirmək də mümkündür. Lazienki Parkı, Müqəddəs Xaç kilsəsi və Şopen Muzeyi Varşavada görülməli yerlər sırasındadır. Xüsusilə klassik musiqi həvəskarları məşhur bəstəkar Frederik Şopenin həyatından bəhs edən muzeyi ziyarət edə bilərlər.
2. Praqa: Tarixi memarlığın valehedici atmosferi
Çexiyanın paytaxtı Praqa qotik kilsələri, barokko üslublu tikililəri və tarixi körpüləri ilə Avropanın ən təsirli şəhərlərindən biri hesab olunur. Şəhərdə istifadə edilən pul vahidi Çexiya kronudur.
Vltava çayının sahilində yerləşən Praqa xüsusilə tarixi mərkəzdə gəzintiyə çıxmağı sevənlər üçün zəngin marşrutlar təklif edir. Köhnə Şəhər meydanı şəhərin keçmişini və memarlıq gözəlliklərini yaxından görmək istəyən turistlərin ən çox ziyarət etdiyi məkanlardandır.
Şəhərin simvollarından sayılan Karl körpüsü, Praqa qəsri, Kafka Muzeyi və Strahov kitabxanası da səyahət planına daxil edilə bilər. Müasir memarlığın diqqətçəkən nümunələrindən olan Rəqs edən ev isə tarixi tikililərin arasında fərqli görünüşü ilə seçilir.
3. Lvov: Ukraynanın tarixi və mədəniyyət mərkəzi
Ukraynanın qərbində yerləşən Lvov tarixi meydanları, memarlıq irsi və kafe mədəniyyəti ilə diqqət çəkir. Şəhərdə istifadə olunan pul vahidi Ukrayna qrivnasıdır.
Lvovun əsas xüsusiyyətlərindən biri müxtəlif tarixi dövrlərin izlərini daşıyan şəhər mərkəzini böyük ölçüdə qoruyub saxlamasıdır. UNESCO-nun Dünya İrsi Siyahısına daxil edilən bu ərazi Avropa memarlığının müxtəlif nümunələrini bir arada görmək istəyən turistlər üçün maraqlı məkandır.
Tarixi meydanların ətrafındakı kafe və restoranlar şəhərin sosial həyatını yaxından tanımaq imkanı yaradır. Lvov xüsusilə ənənəvi Avropa şəhərlərinin atmosferini yaşamaq istəyən səyahətçilərin marağına səbəb ola bilər.
4. Buxarest: Rumıniyanın canlı paytaxtı
Rumıniyanın paytaxtı Buxarest tarixi binaları, geniş küçələri və dinamik sosial həyatı ilə Avropada fərqli səyahət təcrübəsi axtaranlar üçün alternativdir. Şəhərdə avro deyil, Rumıniya leyi istifadə olunur.
Buxarestin Köhnə Şəhər ərazisi tarixi memarlığı ilə yanaşı, restoran və kafeləri ilə də paytaxtın ən canlı məkanlarından biridir. Dar küçələrdə gəzərkən həm şəhərin keçmişini əks etdirən tikililəri görmək, həm də yerli həyat tərzi ilə tanış olmaq mümkündür.
Paytaxtın ən diqqətçəkən tikililərindən biri olan Parlament Sarayı nəhəng ölçüləri və memarlığı ilə ziyarətçilərin marağını cəlb edir. İnqilab meydanı və Rumıniya Milli İncəsənət Muzeyi də şəhərin mədəni zənginliyini kəşf etmək istəyənlərin ziyarət edə biləcəyi məkanlardandır.
5. Moskva: Rusiyanın möhtəşəm memarlığı
Rusiyanın paytaxtı Moskva tarixi meydanları, monumental tikililəri və özünəməxsus memarlığı ilə digər Avropa şəhərlərindən fərqlənir. Şəhərdə istifadə olunan pul vahidi Rusiya rubludur.
Moskva deyildikdə ilk yada düşən məkanlardan biri şəhərin tarixi mərkəzində yerləşən Qızıl meydandır. Rəngarəng günbəzləri ilə tanınan Müqəddəs Vasili kilsəsi meydanın ən diqqətçəkən tikililərindəndir.
Kreml və Dövlət Tarix Muzeyi də Rusiyanın tarixi və mədəni irsi ilə yaxından tanış olmaq istəyənlər üçün mühüm ziyarət məkanlarıdır. Şəhərin geniş meydanları və əzəmətli memarlığı Moskvanı fərqli səyahət istiqamətinə çevirir.
Bizi sosial şəbəkələrdən izləyin!!
