Almaniyada Federal Məşğulluq Agentliyi (BA) ölkə iqtisadiyyatında artım tempinin zəifləməsi səbəbindən gələn ilin əvvəlində işsizlərin sayının 3 milyon nəfəri keçəcəyini proqnozlaşdırır.

Banco.az xəbər verir ki, Agentliyin prezidenti Andrea Nahles Nürnberqdə noyabr ayı əmək bazarı statistikasının təqdimatında bildirib ki, ölkədə məşğulluq artımı dayanıb və işçi qüvvəsinə tələbat zəifləməkdə davam edir.

“İqtisadi zəiflik davam edir və əmək bazarı durğun görünür”, – deyə Nahles vurğulayıb. Onun sözlərinə görə, Almaniyanın əmək bazarında ortamüddətli daha ciddi problem demoqrafik vəziyyət və ixtisaslı kadr çatışmazlığıdır.

Rəsmi məlumatlara əsasən, mövsümi təsirlərdən təmizlənmiş işsizlərin sayı noyabr ayında oktyabra nisbətən 1 000 nəfər artaraq 2 milyon 973 min nəfərə yüksəlib. Bazar gözləntiləri isə 5 000 nəfərlik artım idi. 

Şirkətlərin təqdim etdiyi açıq iş yerlərinin sayı da azalıb – ötən ilin eyni dövrü ilə müqayisədə 44 min yer azalaraq 624 minə düşüb.