Müəllif: Tamara Mustafayeva, Banco.az
Almaniya iqtisadiyyatı 2022-ci ildən bəri ilk dəfə olaraq böyüyüb, çünki hökumətin xərcləmə təşəbbüsləri ölkəyə uzun müddətdir davam edən sənaye böhranının öhdəsindən gəlməyə kömək edib.
Banco.az xəbər verir ki, “Almaniya Federal Statistika İdarəsi”nin məlumatlarına görə, ümumi daxili məhsul (ÜDM) iki il ardıcıl daralmadan sonra 2025-ci ildə 0,2 faiz artıb. Bu göstərici Bloomberg analitik sorğusunda yer alan orta proqnozla üst-üstə düşür.
Dördüncü rübdə də iqtisadi artım eyni səviyyədə qeydə alınıb.
Beləliklə, ölkə iqtisadiyyatı 2023-cü ildəki 0,9 faiz və 2024-cü ildəki 0,5 faiz azalmadan sonra 2025-ci ildə ilk dəfə artım nümayiş etdirib.
Statistika İdarəsi cümə axşamı yaydığı açıqlamada bildirib ki, ötən ildəki iqtisadi artım əsasən ev təsərrüfatlarının istehlakı və dövlət xərcləri hesabına baş verib, investisiyalar azalıb, ticarət isə artımı zəiflədib.
“Almaniya Federal Statistika İdarəsi”nin rəhbəri Rut Brand mətbuat konfransında bildirib:
“İki illik durğunluqdan sonra Almaniya iqtisadiyyatı yenidən artım mərhələsinə keçib. Bu artım əsasən ev təsərrüfatları istehlakının və dövlət xərclərinin yüksəlməsi ilə əlaqələndirilə bilər.”
Avropanın ən böyük iqtisadiyyatı son illərdə enerji böhranı, kritik əhəmiyyətli resurslara çıxış problemləri və ABŞ Prezidenti Donald Trampın qlobal ticarətə vurduğu zərbə kimi amillərdən təsirlənib. Bu faktorlar xüsusilə ölkənin sənaye mərkəzinə ciddi ziyan vurub.
Bizi sosial şəbəkələrdən izləyin!!
