Müəllif - Fərid İslamov  - Banco.az 

ABŞ Maliyyə Nazirliyinin qızıl ehtiyatlarının qiymətləndirilməsi ilin əvvəlindən bəri qiymətli metalın 45% artması nəticəsində 1 trilyon dolları ötüb.

Maliyyə Nazirliyinin məlumatına görə, ona 261,5 milyon unsiya qızıl, yəni 8,1 min ton məxsusdur. Bu həcmin təxminən yarısı Fort-Noksda, qalanı isə West Point və Nyu-Yorkda saxlanılır.

Comex birjasında dekabr fyuçersləri bazar ertəsi 1% artaraq 3847 dollar/unsiya səviyyəsinə çatıb.

ABŞ dünyanın ən böyük qızıl saxlayıcısıdır. İkinci yerdə Almaniya (3,4 min ton), üçüncü yerdə İtaliya (2,5 min ton), dördüncü yerdə Fransa (2,4 min ton), beşinci yeri isə Rusiya və Çin (hər biri 2,3 min ton) bölüşür, Bloomberg bildirir.

Qeyd olunur ki, sənədlərdə ABŞ Maliyyə Nazirliyinin qızıl ehtiyatının dəyəri 1973-cü ildə müəyyən edilmiş və dəyişməyən 42,22 dollar/unsiya sabit qiymət əsasında qiymətləndirilir. Cari bazar qiymətləri ilə yenidən qiymətləndirmə isə dövlətə məxsus qızılın dəyərini 90 dəfədən çox artırır.