Müəllif: Tamara Mustafayeva, Banco.az
ABŞ-da ikinci rübdə iqtisadi artım gözləntilərdən zəif olub.
Banco.az xəbər verir ki, ABŞ iqtisadiyyatı bu ilin ikinci rübündə illik hesabla 1,5 faiz artaraq bazar gözləntilərini doğrultmayıb.
“Bloomberg”in iqtisadçılar arasında keçirdiyi sorğunun median proqnozu iqtisadi artımın 2 faiz olacağı istiqamətində idi.
Qeyd edək ki, ABŞ iqtisadiyyatı ilin birinci rübündə 2,1 faiz böyümüşdü.
Rübdən-rübə dəyişkənlik göstərə bilən xalis ixracın azalması daxili tələbin güclü olmasının təsirini qismən zəiflədib. İqtisadi fəallığın təxminən üçdə ikisini təşkil edən istehlak xərcləri isə ikinci rübdə 3,2 faiz artaraq dayanıqlı dinamika nümayiş etdirib.
Açıqlanan göstəricilər ABŞ iqtisadiyyatının İranla müharibənin yaratdığı mənfi təsirlərə baxmayaraq dayanıqlığını qoruduğunu göstərir. Münaqişə qiymətlərin yüksəlməsinə və iqtisadi etimadın zəifləməsinə səbəb olsa da, rübün sonuna doğru benzin qiymətlərinin enməsi, gözləniləndən yüksək vergi geri ödənişləri və geniş satış kampaniyaları ev təsərrüfatlarının xərclərini dəstəkləyib.
Süni intellekt sahəsinə yönələn iri həcmli investisiyalar fonunda biznes investisiyaları da artmaqda davam edib. “Meta Platforms” və “Microsoft” kimi iri texnologiya şirkətləri investorların bu yatırımların gəlirliliyi ilə bağlı narahatlıqlarına baxmayaraq, məlumat mərkəzlərinin tikintisinə və süni intellekt texnologiyalarına böyük həcmdə investisiya yatırmağı davam etdirirlər.
Bizi sosial şəbəkələrdən izləyin!!
