Müəllif:Mehin Qasımova,Banco.az

Venesuela hökuməti ölkə iqtisadiyyatında davamlı artımın qeydə alındığını açıqlayıb.

Banco.az xəbər verir ki, paytaxt Karakasda Milli Assambleyada (AN) çıxış edən Rodrigez Venesuela iqtisadiyyatının artıq 19 rübdür fasiləsiz böyüdüyünü bildirib.

Onun sözlərinə görə, mövcud proqnozlar ölkə iqtisadiyyatının 2025-ci ilə qədər 8,5 faiz artacağını göstərir. Rodrigez vurğulayıb ki, bu artım Venesuelanı Latın Amerikasının aparıcı iqtisadiyyatlarından birinə çevirə bilər.

Rodrigez həmçinin ölkəyə daxil olan bütün xarici valyutanın idarə olunması məqsədilə iki yeni fondun yaradılacağını elan edib. Onun sözlərinə görə, bu fondlar suveren fondlar olacaq və maliyyə resurslarının istifadəsində şəffaflıq əsas prinsip kimi götürüləcək.

Rodrigez əlavə edib ki, sözügedən vəsaitlər hesabına xəstəxanalar, məktəblər, mənzil fondu, su və elektrik enerjisi infrastrukturu, eləcə də digər ictimai xidmətlərin təkmilləşdirilməsi planlaşdırılır.

Venesuela hakimiyyəti bu addımların iqtisadi artımın davamlılığını təmin edəcəyini və sosial rifahın yüksəldilməsinə töhfə verəcəyini bildirir.