Müəllif:Mehin Qasımova,Banco.az

ABŞ prezidenti Donald Trampın dəyişən tarif ritorikası və artan qeyri-müəyyənlik atmosferi səbəbindən dünyanın aparıcı mərkəzi bankları pul siyasətlərinə düzəliş etməkdə çətinlik çəkirlər.

Banco.az xəbər verir ki, bu prosesdə bir çox mərkəzi banklar öz siyasət mətnlərində qlobal iqtisadi qeyri-müəyyənlikləri vurğulayır və pul siyasətini tənəzzül və inflyasiya dilemması arasında balanslı saxlamağa çalışırlar.

Qlobal iqtisadi dairələr ABŞ-ın “Öncə Amerika” siyasəti çərçivəsində həyata keçirdiyi tarif siyasətinin inflyasiya təzyiqlərini gücləndirə və artıma mənfi təsir göstərə biləcəyi ilə bağlı narahatlıqları diqqətlə izləyir .

Aprel ayında Kanada Bankı (BoC), Avstraliya Ehtiyat Bankı (RBA), Cənubi Koreyanın Ehtiyat Bankı, Polşa Mərkəzi Bankı, Macarıstan Mərkəzi Bankı (MNB) və Rusiya Mərkəzi Bankı (CBR) siyasət faizlərini dəyişməz saxlayıb.

Avropa Mərkəzi Bankı (AMB) və Yeni Zelandiya Mərkəzi Bankı siyasət faizlərini aşağı salarkən, Türkiyə Respublikası Mərkəzi Bankı (TCMB) faiz dərəcələrini artırmağa qərar verib.