Ölkənin aparıcı korporativ maliyyə institutu “PAŞA Bank” 29 aprel 2025-ci il tarixində Bakıda “Lizinq və faktorinq: İnkişafın ikitərəfli həlli” adlı konfrans keçirib.
Konfrans çərçivəsində sahibkarlıq fəaliyyəti ilə məşğul olan subyektlərin faktorinq və lizinq məhsulları ilə bağlı qarşılaşdıqları çətinliklər, mövcud çağırışların tərəfdaşlara çatdırılması və Bankın “CustomerFirst” yanaşması ilə bağlı vacib məqamlar müzakirə olunub. Eyni zamanda, maliyyələşmənin sürəti və şəffaflığı, sənəd dövriyyəsinin sadəliyi, onlayn platformaların mövcudluğu və həmin platformaların texniki dəstək keyfiyyəti barədə fikir mübadiləsi aparılıb. Həmçinin, tərəflər arasında müqavilə şərtləri, faizlər və limitlərə dair şəffaf yanaşmaların tətbiqi və məsuliyyət və risk bölgüsünün ədalətli şəkildə aparılması da diqqət mərkəzində olub.
“PAŞA Bank”ın KOS və KİB rəqəmsal məhsul üzrə aparıcı direktoru Heydər Süleymanov çıxış edərək, Bankın təqdim etdiyi faktorinq xidmətinin biznesin maliyyə əlçatanlığını artırmaq və çevikliyini gücləndirmək baxımından əhəmiyyətini vurğulayıb.
“Faktorinq məhsulumuz, sahibkarlara, girovsuz və maliyyə analizi olmadan dərhal maliyyə axınlarını tənzimləmək imkanı verir. Bu məhsulun əsas üstünlüyü odur ki, sahibkarlar mal və ya xidmət təqdim etdikdən sonra PAŞA Banka təqdim etdikləri qaimələr əsasında gözlənilən ödənişi daha qısa müddətdə əldə edirlər. Bu xüsusiyyət, sahibkarlara likvidlik təmin edir və işlərini daha səmərəli idarə etməyə imkan yaradır,” – deyə, Süleymanov bildirib.
Bank rəsmisi qeyd edib ki, “PAŞA Bank” sahibkarların qarşılaşdıqları çətinlikləri aradan qaldırmaq üçün müasir texnologiyalardan geniş istifadə edir. “Məsələn, rəqəmsal platformalarımız üzərindən faktorinq əməliyyatlarını daha sürətli, daha şəffaf və daha rahat həyata keçirə bilirik. Bu, müştərilərimizin vaxtına qənaət etməyə və bazardakı dəyişikliklərə daha sürətli uyğunlaşmalarına imkan verir,”-deyə, H.Süleymanov bildirib.
Qeyd edək ki, tədbirdə Dövlət Vergi Xidmətinin, Dövlət Gömrük Komitəsinin təmsilçiləri, “PAŞA Bank”ın rəhbər heyəti, özəl sektorun nümayəndələri, sahibkarlar da daxil olmaqla 100-ə yaxın qonaq iştirak edib.
