Müəllif: Tamara Mustafayeva, Banco.az
NBA-də nəhəng sövdələşmə: “Los Angeles Lakers” rekord məbləğə satılır.
Banco.az xəbər verir ki, “Bloomberg”ə danışan mənbələrə görə, “Thrive Capital”ın həmtəsisçisi və idarəedici tərəfdaşı Coş Kuşner və “Walt Disney Co.”nun sabiq baş icraçı direktoru Bob Ayger “Los Angeles Lakers” basketbol komandasını 12 milyard dollardan çox rekord məbləğə satın alır.
Coş Kuşner və Bob Ayger daha əvvəl NBA-nin Las-Veqasda genişlənməsi prosesində iştirak ediblər. Daha sonra istiqamətlərini dəyişərək “Lakers”ı maliyyəçi Mark Valterdən satın almaq üçün təklif irəli sürüblər. Valter ötən il komandanın nəzarət səhm paketini Buss ailəsindən satın almışdı.
Ayger və Kuşner birgə açıqlamalarında bildiriblər: “Ömür boyu NBA azarkeşləri olaraq, dünyanın ən məşhur idman komandalarından biri olan ‘Los Angeles Lakers’in rəhbərliyini üzərimizə götürmək fürsətinə sahib olduğumuz üçün böyük şərəf duyuruq. Cerri və Ceni Bussun rəhbərliyinə və uzaqgörənliyinə sonsuz hörmət bəsləyirik. Uzunmüddətli öhdəliyimiz bu təməl üzərində quruculuğu davam etdirmək, ən yüksək səviyyədə rəqabət aparmaq, bu möhtəşəm komandaya, onun azarkeşlərinə və Los-Anceles şəhərinə xidmət etməkdir.”
Ayger bu ilin əvvəlində “ESPN”in ana şirkəti olan “Disney”in rəhbərliyi vəzifəsindən ayrılıb.
İdman mediası üzrə məsləhət şirkəti “LHB Sports, Entertainment & Media”nın baş icraçı direktoru Li Berk sövdələşməni belə qiymətləndirib: “Məbləğ və miqyas baxımından bu sövdələşmə heyrətamizdir. Əgər NBA komandası sahibi olsaydım, çox həyəcanlanardım.”
Bizi sosial şəbəkələrdən izləyin!!
