Müəllif:Mehin Qasımova,Banco.az
"Facebook", "Instagram" və "WhatsApp" platformalarının sahibi Meta-nın gəliri 2026-cı ilin üçüncü rübündə ötən ilin eyni dövrü ilə müqayisədə 26% artaraq 64,6 milyard dollara çatıb.
Banco.az xəbər verir ki, şirkət 2025-ci ilin iyul-sentyabr aylarında 51,2 milyard dollar gəlir əldə etmişdi.
Hesabat dövründə Meta-nın xalis mənfəəti 2,7 milyard dollardan 9,9 milyard dollara yüksəlib. Şirkətin səhm başına mənfəəti də ötən ilin eyni dövründəki 1,05 dollardan 3,83 dollara çatıb.
Meta-nın gəlir və mənfəət göstəriciləri bazar gözləntilərini üstələyib. Şirkət ilin son rübündə gəlirinin 73–76 milyard dollar arasında olacağını proqnozlaşdırır.
Bununla yanaşı, sosial media platformalarının gənclərin psixi sağlamlığına təsiri ilə bağlı hüquqi mübahisələr şirkət üçün əhəmiyyətli maliyyə yükü yaradıb. Meta-nın açıqlamasına əsasən, üçüncü rübün maliyyə nəticələrində bu işlərlə əlaqədar 9,89 milyard dollarlıq xərc əks olunub.
Şirkətin bildirdiyinə görə, bu xərc nəzərə alınmadıqda əməliyyat gəliri 22,88 milyard dollar, səhm başına mənfəəti isə 7,40 dollar təşkil edəcəkdi.
Meta-nın təsisçisi və baş direktoru Mark Zuckerberg süni intellekt və yeni məhsullara yatırılan investisiyaların nəticə verdiyini bildirib. O, şirkətin əsas biznesinin güclü olduğunu və süni intellekt sahəsində mühüm irəliləyişlər əldə edildiyini vurğulayıb.
