Müəllif:Ayşən İmanova/Banco.az
Nüfuzlu insayder Sonni Dikson “X” (keçmiş Twitter) sosial şəbəkəsindəki səhifəsində “iPhone 16E” (SE) büdcəli smartfonunun maketlərinin fotolarını dərc edib.
Banco.az xəbər verir ki, bu barədə “9to5Mac” portalı məlumat yayıb.
Şəkillərdən göründüyü kimi, smartfon iki rəngdə olacaq: qara və ağ. Bundan əlavə, “iPhone 16E”, “iPhone SE” (2022) ilə müqayisədə daha böyük kamera qabarcığı olan tək kameraya sahib olacaq. Məlumata görə, bu kameranın təsvir ölçüsü 48 meqapiksel təşkil edəcək.
Yeni cihazın yan panelində düz alüminium çərçivəni və indiki “iPhone” modellərində fəaliyyət düyməsi ilə əvəz edilmiş səssiz rejim açarını görmək mümkündür.
Şayiələrə görə, yeni “iPhone SE” “iPhone 16E” adlandırılacaq. Mütəxəssislər hesab edir ki, yeni smartfon SE seriyasının büdcəli modelinə bənzəmir. Buna görə də, "Apple" onu "iPhone 16E" adlandıraraq hazırkı "iPhone SE" modelini daha ucuz qiymətə satmağa davam edə bilər.
“iPhone 16E”nin təqdimatının büdcəli 11-ci nəsil iPad planşeti ilə birlikdə bu yaz, mart və ya aprel aylarında baş tutacağı gözlənilir.
