Müəllif - Fərid İslamov - Banco.az
Amerika şirkəti Intel Corp. Ohayo ştatında yarımkeçirici məhsulların istehsalı zavodunun tikintisinin tamamlanma və istifadəyə verilmə müddətlərini təxirə salır. Bu barədə Intel-in sifarişlə çip istehsalı bölməsinin (Foundry) baş meneceri Naqi Çandrasekaranın əməkdaşlara ünvanladığı məktubda deyilir. Məktubun mətni şirkətin saytında dərc olunub.
Xüsusilə, zavodun birinci mərhələsinin tikintisi indi 2030-cu ildə, ikinci mərhələsi isə 2031-ci ildə başa çatdırılacaq. İstifadəyə verilmə tarixləri müvafiq olaraq 2030-2031 və 2032-ci illər üçün planlaşdırılır.
Əvvəllər hər iki mərhələnin tikintisinin 2026-2027-ci illərdə tamamlanması, istifadəyə verilməsinin isə 2027-2028-ci illərdə baş tutması nəzərdə tutulurdu.
"Biz Amerika istehsal sahələrinə investisiya qoymağa davam edirik və bu fonda zavodlarımızda istehsalın başlama müddətlərini biznesimizin ehtiyaclarına və ümumi bazar tələbatına uyğunlaşdırmaq vacibdir," - məktubda qeyd olunur. "Biz həmişə bu yanaşmanı rəhbər tutmuşuq, çünki bu, kapitalı məsuliyyətlə idarə etməyə və müştərilərin ehtiyaclarına uyğunlaşmağa imkan verir."
Ohio One zavodunun ümumi dəyəri 28 milyard dollardan çoxdur. Onun tikintisi 2022-ci ildə başlayıb.
Bazar ertəsi günü ilkin ticarət zamanı Intel səhmlərinin qiyməti 0,3% aşağı düşür.
