Müəllif:Mehin Qasımova,Banco.az
Fransanın paytaxtı Parisdə yerləşən Luvr Muzeyinin həmkarlar ittifaqları tətilə başlayacaqlarını elan ediblər.
Banco.az xəbər verir ki, işçilər muzeydə təcili təmir işlərinin aparılmasını, işçi sayının artırılmasını və yanvar ayından etibarən Aİ xaricindən gələn ziyarətçilər üçün planlaşdırılan bilet qiymət artımının ləğv edilməsini tələb edirlər.
Dünyanın ən çox ziyarət edilən muzeyi olan Luvr son aylarda ardıcıl qalmaqallar, texniki problemlər və təhlükəsizlik böhranları ilə gündəmdədir. Tətil səbəbindən muzeyin Milad dövründə qismən və ya tamamilə bağlanma riski yarandığı bildirilir.
İttifaqlar illərdir davam edən ixtisarların və dövlət investisiyalarının azalmasının Luvrdakı mövcud böhranı daha da dərinləşdirdiyini bildirirlər. Məlumata görə, muzey ötən il 8,7 milyon ziyarətçi qəbul edib, lakin 2015-ci ildən bu yana 200 nəfər işdən çıxarılıb. İşdən çıxarılanların əhəmiyyətli hissəsini mühafizəçilər təşkil edir.
Tətilin əsas səbəblərindən biri də bilet qiymətləri ilə bağlı qərardır. Yanvar ayından etibarən Aİ xaricindən gələn ziyarətçilər üçün biletin qiymətinin 32 avroya qaldırılması planlaşdırılır ki, bu da 45 faiz artım deməkdir. Həmkarlar ittifaqları bu addımı ayrı-seçkilik kimi qiymətləndirir.
Son aylarda Luvr bir neçə ciddi insidentlə üzləşib. Oktyabrın 19-da dörd nəfər gündüz vaxtı muzeyə daxil olaraq cəmi yeddi dəqiqə ərzində təxminən 88 milyon avro dəyərində Fransa kral zinət əşyalarını oğurlayıb. Oğurlanan əşyalar hələ də tapılmayıb, dörd şübhəli saxlanılıb və istintaq aparılır.
Noyabr ayında isə Misir bölməsində partlamış borudan sızan su nəticəsində 300–400 nadir tarixi kitab zədələnib. Daha sonra tavan təhlükəsizliyi ilə bağlı narahatlıqlar səbəbindən qədim yunan keramikalarının nümayiş etdirildiyi doqquz otaqlı qalereya bağlanıb.
