Müəllif:Ayşən İmanova/Banco.az
ABŞ xam şəkər fyuçersləri Braziliyada yaxşı məhsul və Hindistandan ixracın bərpası gözləntiləri ilə 2021-ci ilin yayından bəri ən aşağı səviyyəyə enib.
Banco.az xəbər verir ki, Londonun ICE birjasında mart ayı şəkər fyuçersləri 2,5% ucuzlaşaraq bir funt üçün 17,77 sentə düşüb.
“Trading Economics”in məlumatına görə, dünyanın ikinci ən böyük şəkər istehsalçısı olan Hindistanın hakimiyyət orqanları sentyabrın sonunda başa çatacaq cari kənd təsərrüfatı ilində 1 milyon tona qədər şəkər ixracı üçün kvota verib. Ümumilikdə, ölkə bu kənd təsərrüfatı ilində 27 milyon tondan çox şəkər istehsal etməyi gözləyir.
Eyni zamanda dünyanın aparıcı şəkər istehsalçısı olan Braziliyada şəkər qamışı plantasiyaları üçün əlverişli hava şəraiti ölkə üzrə məhsul proqnozlarının daha yüksək olmasına səbəb olub. Bundan əlavə, etanolun qiymətlərinin düşməsi fermerləri bioyanacaq istehsalına deyil, daha çox qamışı şəkər emalına yönəlməyə vadar edib.
