Müəllif:Gülbəniz Hüseynli/Banco.az
Warren Buffett maliyyə dünyasında uğurun və strateji investisiyaların simvoludur. O, sadə ticarət üsulları ilə başlayaraq, illər ərzində dünyanın ən zəngin insanlarından birinə çevrilib. Gənc yaşlarında qapı-qapı dolaşıb Coca-Cola və saqqız satan Buffett, əldə etdiyi ilk gəlirlərlə torpaq sahəsi alaraq maliyyə bazarında ilk addımlarını atdı.
Banco.az bu məqalədə Buffett-in uğur yolu, investisiya prinsipləri və strategiyaları barədə ətraflı məlumat verəcək:
Buffett 1962-ci ildə Berkshire Hathaway-in səhmlərini satın alanda, şirkət ciddi maliyyə çətinlikləri ilə üzləşirdi. O dövrdə səhmlərin balans dəyəri xalis dövriyyə kapitalı ilə müqayisədə aşağı idi. CEO olduqdan sonra, 1960-cı illərin sonlarında 8 dollara alınan səhmlərin qiyməti 20 dollara yüksəldi. 2024-cü ilin sentyabr ayına olan məlumata görə, Berkshire Hathaway Class A səhmlərinin dəyəri 679.000 dollardan çoxdur.
Buffett-in 1972-ci ildə "See’s Candies"-i satın alması daha çox pul axınına səbəb oldu. O, həmçinin American Express, Bank of America, Coca-Cola və Apple kimi nəhəng brendlərə sərmayə yatırdı. 1988-ci ildə The Coca-Cola şirkətinin 7%-ni 1,02 milyard dollara satın alaraq, şirkətin əsas səhmdarlarından birinə çevrildi. Bu, Berkshire Hathaway-in ən gəlirli investisiyalarından biri oldu.
Buffett müxtəlif sahələrdə də investisiyalar etdi:
- 1973-cü ildə Berkshire Washington Post-un səhmlərini aldı.
- 1977-ci ildə dolayı yolla Buffalo Evening News-dan 32,5 milyon dollarlıq səhm satın aldı.
- 1979-cu ildə Berkshire ABC-də səhmlər almağa başladı və birləşmiş şirkətdə 25% paya sahib oldu.
- 1987-ci ildə Salomon Inc-in 12% payını satın alaraq, onu ən böyük səhmdarına çevirdi və şirkətin direktorlar şurasına daxil oldu.
İllər ərzində ardıcıl olaraq gəlir əldə edən Buffett-in sərvəti 149,7 milyard ABŞ dolları təşkil edir. Bu, onu dünyanın səkkizinci ən zəngin adamı edir. O, sərvət yaratmaq üçün beş əsas prinsipə əməl edir:
- Uzunmüddətli investisiya strategiyası – Tez qazanc əldə etmək əvəzinə uzunmüddətli sərmayələrə üstünlük verir.
- Məlumatlı olmaq – İnvestisiya etməzdən əvvəl dərin araşdırmalar aparır.
- Rəqabət üstünlüyünü qorumaq – Güclü və davamlı şirkətlərə sərmayə yatırır.
- Keyfiyyətə diqqət yetirmək – Yüksək keyfiyyətli şirkətlərin səhmlərini almağa üstünlük verir.
- Risklərin idarə edilməsi – Sərmayə qoyarkən riskləri minimuma endirmək üçün strategiyalar qurur.
Hazırda onun investisiya prinsipləri və biznes fəlsəfəsi maliyyə dünyasında hələ də örnək kimi qəbul edilir.
