Müəllif:Mehin Qasımova,Banco.az

Çin idman geyimi nəhəngi "Anta Sports" Puma-nın mümkün satışında maraqlı olan əsas namizədlərdən biri kimi göstərilir.

Banco.az xəbər verir ki, "Anta" şirkət üçün təklif imkanlarını qiymətləndirmək məqsədilə məsləhətçi ilə çalışır və təklif vermək qərarı olarsa, özəl kapital fondu ilə ortaq ola bilər.

Xəbər yayıldıqdan sonra Puma-nın səhmləri Almaniyanın Tradegate birjasında 11% bahalaşıb.

Mənbələr bildirir ki, potensial alıcılar sırasında digər Çin şirkəti "Li Ning Co." da var. Şirkət banklarla maliyyələşdirmə imkanlarını müzakirə edir. 

Puma-nın bazar dəyəri hazırda 2,5 milyard avro təşkil edir. Lakin şirkətin böyük səhmdarlarından olan fransalı Pinault ailəsinin yüksək qiymətləndirmə gözləntiləri prosesin əsas maneələrindən biri ola bilər. Pinault ailəsi holdinqi "Artémis" vasitəsilə Puma-nın 29%-nə sahibdir.

"Anta" isə bu il Honq-Konq birjasında 10% dəyər qazanaraq bazar kapitallaşmasını 31 milyard dollara çatdırıb. Şirkət 2019-cu ildə Amer Sports-un satın alınmasına rəhbərlik etmişdi.

Son illərdə məhsullarına tələbatın azalması fonunda "Puma" yeni CEO Arthur Hoeldin rəhbərliyi ilə bərpa strategiyası həyata keçirir. Şirkət Adidas-ın keçmiş top-menejeri Andreas Huberti COO vəzifəsinə gətirib və daha cəlbedici marketinq hekayələri üzərində işləyir. "Puma" həmçinin ötən ay 900 işçinin ixtisar ediləcəyini açıqlamışdı.

Marka 2027-ci ilə qədər yenidən böyüməyə qayıtmağı və qlobal idman brendləri arasında ilk üçlükdən birinə çevrilməyi hədəfləyir.