Müəllif - Eldar Kərimov - Banco.az
Apple Inc. Birləşmiş Krallıqda Advanced Data Protection (ADP) - bulud məlumatlarının genişləndirilmiş qorunması funksiyasını deaktiv edəcək.
Bu qərar, KİV-də Birləşmiş Krallıq hakimiyyətinin Apple-dan bütün dünyada müştəri məlumatlarına çıxış üçün xüsusi bir "bəkdor" yaratmağı tələb etməsi barədə xəbərlər yayımlandıqdan iki həftə sonra qəbul edilib.
Apple cümə günü bildirib ki, ADP funksiyası Birləşmiş Krallıqda yeni istifadəçilər üçün əlçatan olmayacaq. Artıq bu funksiyanı istifadə edənlər isə müəyyən bir müddət ərzində onu əl ilə deaktiv etməli olacaqlar ki, iCloud hesablarını qoruyub saxlasınlar.
ADP for iCloud - bulud məlumatlarının təhlükəsizliyini artırmaq üçün uçdan-uca şifrələmə təmin edən əlavə, könüllü bir funksiyadır. Bu funksiya iCloud ehtiyat nüsxələri, qeydlər, fotolar, mətn mesajları və digər məlumatları qoruyur.
Apple-ın bəyanatında deyilir:
"Müştərilərimizin konfidensiallığına qarşı artan təhdidlər və məlumat sızmaları fonunda ADP tərəfindən təmin edilən qorumanın Birləşmiş Krallıq müştərilərimiz üçün əlçatan olmayacağı bizi son dərəcə məyus edir."
ADP-nin deaktiv edilməsi, iMessage və FaceTime kimi Apple xidmətləri üçün standart olaraq tətbiq edilən uçdan-uca şifrələmə funksiyasının silinməsi demək deyil.
Financial Times qəzetinin mənbələrə istinadən verdiyi məlumata görə, yanvar ayında Apple Birləşmiş Krallıq hakimiyyətindən bir tələb alıb. Bu tələb, hüquq-mühafizə orqanları və xüsusi xidmətlər üçün iPhone ehtiyat nüsxələri və digər bulud məlumatlarına çıxış imkanı verən bir "bəkdor" yaradılmasını nəzərdə tuturdu. Bu məlumatlara normal şəraitdə hətta Apple özü belə çıxış əldə edə bilməzdi.
