Müəllif: Tamara Mustafayeva, Banco.az
“Anthropic” IPO üçün məxfi ərizə təqdim edir.
Banco.az xəbər verir ki, süni intellekt şirkəti “Anthropic” uzunmüddətli rəqibi olan “OpenAI” ilə bu payızda “Wall Street”də keçiriləcək ilkin kütləvi səhm təklifi (IPO) yarışına hazırlaşarkən, IPO üçün tələb olunan ilkin sənədləri məxfi şəkildə ABŞ-nin Qiymətli Kağızlar və Birja Komissiyasına (SEC) təqdim edib.
Şirkət bazar ertəsi yaydığı açıqlamada bildirib ki, “ictimaiyyətə təklif olunacaq səhmlərin sayı və qiyməti hələ müəyyən edilməyib”.
“Anthropic”, “OpenAI” və “SpaceX” yeni maliyyə mənbələrinə çıxış əldə etmək məqsədilə IPO planlarını irəli aparırlar. Özəl bazarlarda maliyyələşdirmə fəaliyyəti sürətlə artsa da, IPO şirkətlərə daha geniş investor kütləsinə çatmaq imkanı yaradır.
“Anthropic” ilə “OpenAI” arasındakı rəqabət son aylarda daha da güclənib. “Bloomberg”in may ayında yayımladığı xəbərə görə, “OpenAI” də yaxın həftələrdə IPO üçün məxfi müraciət sənədlərini hazırlayır və payız mövsümündə birjaya çıxmağı hədəfləyir.
Məsələyə yaxın mənbələrin bildirdiyinə görə, “Goldman Sachs”, “JPMorgan” və “Morgan Stanley”in həm “Anthropic”, həm də “OpenAI”nin IPO proseslərində mühüm rol oynaması gözlənilir.
İlkin kütləvi səhm təklifini ilk həyata keçirən şirkətin daha geniş investor marağı cəlb edərək daha çox kapital toplamaq üstünlüyü əldə edə biləcəyi qeyd olunur.
Bizi sosial şəbəkələrdən izləyin!!
