Müəllif:Ayşən İmanova/Banco.az
Asiya İnfrastruktur İnvestisiya Bankı (AİİB) Özbəkistanın yaşıl və inklüziv iqtisadiyyatını dəstəkləmək üçün 250 milyon dollar ayıracaq.
Banco.az xəbər verir ki, bu barədə bankın mətbuat xidməti məlumat yayıb.
Məlumata görə, layihə “Özbəkistan-2030” milli inkişaf strategiyasına və yenilənmiş Milli Müəyyənləşdirilmiş Töhfələrə (NDC) uyğun olaraq iqtisadi artımın təşviqinə kömək edəcək. Buna əsasən, respublika 2030-cu ilə qədər ÜDM vahidinə düşən istixana qazı emissiyalarını 2010-cu il səviyyəsindən 35% azaltmalıdır.
Qeyd olunur ki, layihə su və torpaq idarəçiliyinin təkmilləşdirilməsi kimi sahələri əhatə edəcək. Həmçinin cəmiyyətin həssas təbəqələrinə fayda verən bərpa olunan enerji təşəbbüslərinin həyata keçirilməsinə xüsusi diqqət yetiriləcək.
