Müəllif:Mehin Qasımova,Banco.az

ABŞ-də keçiriləcək ara seçkilərin nəticələri təkcə ölkənin siyasi mənzərəsinə deyil, həm də qlobal maliyyə bazarlarına təsir göstərə bilər.

Banco.az xəbər verir ki, investorlar seçkilərin nəticələrinin Donald Tramp administrasiyasının iqtisadi və xarici siyasətində yarada biləcəyi dəyişiklikləri diqqətlə izləyirlər.

Analitiklərin fikrincə, Konqresdə Demokratların çoxluq qazanması Trampın qanunvericilik təşəbbüslərini çətinləşdirə, Respublikaçıların mövqelərini qoruması isə administrasiyanın manevr imkanlarını genişləndirə bilər.

Seçkilərin bazarlara mümkün təsiri əsasən dörd istiqamətdə gözlənilir. Bunlara süni intellekt sektoruna yatırımların tənzimlənməsi, ABŞ-İran münasibətləri və neft qiymətləri, dövlət büdcəsi kəsiri və gömrük tarifləri daxildir.

Xüsusilə süni intellekt şirkətlərinə yatırımların gəlirliliyi, Yaxın Şərqdə mümkün gərginlik və yeni tarif qərarları investorların diqqət mərkəzindədir. Bu amillər texnologiya səhmlərinə, enerji qiymətlərinə, inflyasiyaya və ABŞ istiqrazlarının gəlirliliyinə təsir göstərə bilər.

Beləliklə, ara seçkilərin nəticələri yaxın iki ildə ABŞ-ın iqtisadi siyasətinin istiqamətini müəyyənləşdirməklə yanaşı, qlobal investorların risk qiymətləndirmələrində də mühüm rol oynaya bilər.